Шестри чину св. Василия Велького нащивели Керестур

автор Ол. Живкович
154 Опатрене

РУСКИ КЕРЕСТУР – Внєдзелю пополадню, 14. априла керестурску парохию нащивели шестри Василиянки: ш. Анастазия Питка, ЧСВВ зоз Осєку, ш. Моника Ятюк, ЧСВВ, зоз Арґенитини и ш. Анна Ляшок, ЧСВВ, зоз Филаделфиї, Пенсилвания (ЗАД).

Шестра Моника и ш. Анна пришли до Горватскей пре иншаки причини, алє кед похопели же место народзеня их сновательки блаженей мати Софрониї Ерделї нєдалєко од Осєку, нащивели и Керестур.

Шестра Моника з тей нагоди виявела же им потребне чудо же би Мати Софрония була преглашена за святу, а як дзивка з нашого народу и нашого валалу, вона нас найлєпше може заступац при Господу Богу. Мати Софрония за Керестур нє забула и сце нас заступац пред Богом, пренєсц му нашо молитви. Шестри зоз Арґентини маю молитви до нєй котри нам пошлю же бизме ше на таки способ повязали, през єй заступнїцтво.

Шестром потребна єй библиоґрафия, жадаю дознац цо вецей о нєй и о єй живоце, видзиц дзе була єй хижа, даяки здогадованя людзох и потомкох з єй фамелиї котри би им могли послац. Єст вельо чуда котри ше по єй заступнїцтве уж случели, алє з оглядом же за преглашенє за святих потребне и потвердзенє медицинских фаховцох, тото ище нє маю. Шестра Моника потвердзує же єст наисце вельо чуда духовного приблїжованя, чуда обраценя ґу Господу Богу у Арґентини и Буенос Айресу по затупнїцтву мати Софрониї.

Попри парохиї, шестри Василиянки нащивели и помодлєли ше за душу епископа Дионизия у крипти, нащивели Катедралну цекрву св. о. Миколая у котрей ше ш. Софрония найвироятнєйше и кресцела, стретли ше у манастире зоз нашима шестрами Служебнїцами НДМ, а на одходзе нащивели и нашу Водицу.

Яка велька їх любов ґу мати Софрониї, їх сновательки у Арґентини шведочи и вельке почитованє котре указали ґу шицким з котрима ше стретли, а окреме ґу Рускому Керестуру и народу котри подаровал Господу мати Софронию Ерделї, ЧСВВ.

ПОВЯЗАНИ ТЕКСТИ