ВЕРБАС – У 4. колу Розвойней фодбалскей лиґи, у хторей наступаю фодбалски клуби зоз вербаскей и кулскей општини, всоботу 14. октобра Русиново когуцики и пионире у госцох одбавели 5 стретнуца процив екипи ЦФК зоз Вербасу.
Наймладшим когуциком, дзецом 1. класи, удало ше звладац моцного процивнїка зоз 6:4 дзекуюци цалей екипи хтора ше по конєц твардо борела, а окреме тим хтори посцигли и ґоли, а то – Лука Тасич (3), Дориян Попмович (2) и Павле Виславски.
У шлїдуюцей екипи наступели кус старши когуцики, дзеци 2. класи, вони поражени зоз 4:0.
Младши пионире, дзеци 3.и 4. класи цали перши полчас трацели зоз 5:0, медзитим, после пременкох хтори уводзи тренер Зденко Шомодї, млади бавяче виєдначую на 5:5. Ґоли за тоту екипу дали – Давид Гарди 3, Иван Надь и Кристиян Чонка.
За чарно-билих пионирох, процив дзивчатох з Вербасу, бавели и Русиново дзивчата у составе – Клара Блаґоєвич, Николина Гарди, Милена Рамач и Анастасия Пекич, алє домашнї ше лєпше указали та однєсли побиду зоз 4:2.
Найстарши пионире, дзеци 5. класи, од Вербащаньох на тим змаганю страцели зоз 5:0, но и русиновци ше, гоч у ослабеним составе, по остатню минуту шмело борели.
Того викенду, на соботу 21. октобра, наймладши Русиново селекциї дочекаю екипу Сут’єска зоз Бачкого Доброго Поля.
