Театрални живот Руснацох нєшка ше скоро виключно одвива на релациї Руски Керестур – Нови Сад. Затераз ше нє нагадує же ше тота ситуация пошвидко пременї. У тей сезони представи нєт вельо, алє шицки маю свойо квалитети, цо и найважнєйши критериюм.
Вироятно найприємнєйши нєсподзиваня у чечуцей сезони хторей ше уж нагадує законченє приходзи нам з чаривного швета дзецинского театру. Представа „Петро Пан”, хтору по класичним дїлу з вельку ґрупу керестурских школярох у рамикох дзецинскей секциї Драмского студия АРТ поставели Ребека Планчак и Мирослав Малацко, барз крашнє прилапела наймладша публика, алє є припозната и на фаховим уровню – млади ґлумци Олеґ Катона у насловней улоги и Кристина Гарвильчак як нараторка, наградзени и на Покраїнскей смотри у Темерину. Ґу тому, Нада Лендєр з дзецми кулского РКУД „Др Гавриїл Костельник” на сцену поставела представу „Важне писмо” по мотивох прози Михайла Ковача, а на сцени ше и у тей сезони затримала представа „Инсталуй и ти дїдов джи пи ти (GPT)” Руского народного театру „Петро Ризнич Дядя”, хтору по тексту Ирини Гарди Ковачевич и Славка Ороса виводзи Емил Няради у режиї Владимира Надя. Треба спомнуц и младежску представу „Полїчки”, авторске дїло Саши Палєнкаша хтору з екипу младих ґлумицох поставел у самостойней продукциї, як интересантни импровизаторски експеримент и ошвиженє руского театралного репертоару.
Кед бешеда о рускей драмскей продукциї за одроснуту публику, наш театрални живот ше остатнї роки случує виключно на осовини Руски Керестур – Нови Сад, односно жиє на сценох и у ансамблох РНТ „Петро Ризнич Дядя” и Драмского студия АРТ Дому култури Руски Керестур, як и Драмского студия „Звонимир Павлович” Руского културного центру у Новим Садзе. У тих двох местох отримую ше и нашо єдини два театрални манифестациї – вжиме, у децембру отримани 22. Руски фестивал малих сценских формох „Дюра Папгаргаї”, а наяр, у своїм узвичаєним термину, алє нє на своєй матичней сцени и 57. Драмски мемориял Петра Ризнича Дядї.
Дас 10–15 роки назадок нє було так – Дружтво Руснацох у Суботици мало озбильни и квалитетни представи, вербаски „Карпати” тиж так, приходзели нам представи з Петровцох… после длугшей прерви, Дюрдьов ше залоньским на сцени ознова зявел з младежску представу у режиї Янка Лендєра, хтора нагадла же руска заєднїца у тим нашим валалє ма ґлумецки потенциял з хторим мож робиц и, цо ище важнєйше, єст за тото дзеки, алє затераз приповедка остала на тей єдней сезони…
Поведло би ше, можебуц, же ше театрална кнїжка при Руснацох зведла на гореспомнути три слова, алє шлєбодно мож повесц же су виписани з верзалом. РНТ, АРТ и РКЦ нам и у тей сезони випоручели премиєри солидних представох. Можебуц нє епохалних по хторих ше у будуцих рокох будзе ровнац и евалуовац наш театер, алє вецей од коректних, солидних витвореньох хтори сиґурно чуваю пламень рускей драми.
З националним ансамблом Янко Лендєр поставел „Полицайох” Славомира Мрожека, драмски фалат з хторим пред, тераз уж 50 и пол роками, у новосадскей Матки, тедишнїм „Максиму Горким”, наш дотеди стриктно аматерски театер ступел на длугоку и нєлєгку драгу ґу професионализациї, голєм кед слово о квалитету сценского вислову. Владимир Надь з АРТ-ом поставел класичне дїло Ивана Франка „Будка число 27” хторе премиєру мало на 57. Драмским мемориялу Петра Ризнича Дядї. Так зме достали два квалитетни, ремеселнїцки одлично поставени витвореня – єдну вельку ансамбл-представу з универзалну тему и актуалним порученьом, и єдну скоро камерну хтору ноша квалитетни ґлумецки интерпретациї – здогаднїме, Мирослав Малацко и Ребека Планчак за нїх заслужено наградзени и на смотри у Червинки. Тогорочна новосадска представа – „Чарни лебед” хтору по жридловим тексту Звонимира Павловича режирал Славко Винаї, лєм нєдавно почала свой сценски живот, алє сиґурно потвердзує же нєвельки, алє нєупитно квалитетни ансамбл Драмского студия „Звонимир Павлович” достойно чува характер и предлужує традицию новосадскей сцени хтору зачали Мирон Канюх и спомнути Павлович – поставяц нєлєгки представи у циньох помедзи шветлом и цмоту хтори вимагаю вельки анґажман и од глумцох и од публики.
Шицко наведзене нє точка, алє точка и запята на чечуцу театралну сезону 2024/25. при Руснацох. Прето, ниа, таксативно ище даскельо актуалносци – У Руским Керестуре почала серия роботньох Театер на дланї, хтору РНТ „Петро Ризнич Дядя” реализує за театралних ентузиястох младшого возросту. Источашнє. РНТ би тих дньох мал розпочац вибор директора у новим мандату, понеже заключена Явна поволанка за приявйованє кандидатох. Завод за културу войводянских Руснацох нєдавно розписал тогорочни конкурс за софинансованє сучасней творчосци хтори облапя и драмску дїялносц, а по конєц мая тирва и Конкурс за ориґинални нови руски театрални тексти за 23. Руски фестивал малих сценских формох „Дюра Папгаргаї” – 2025. На концу, после премиєри „Чарного лебеда”, Руски културни центер по конєц мая наявел отримованє другей, закончуюцей часци тематскей програми Звонимир Павлович 70 на чесц рочнїци народзеня автентичного и особеного театралного творителя чийо мено нєшка ноши Драмски студио РКЦ-а.