У коцурскей и вербаских основних школох скрацени годзини

автор Рутенпрес
102 Опатрене

КОЦУР/ВЕРБАС – По остатнїх информацийох, спрам одлуки векшини занятих у Основней школи „Братство єдинство” у Коцуре котри у нєпоштредней роботи зоз школярами, од 29. януара школска годзина у спомнутей школи будзе тирвац 30 минути. Учительом котри тримаю годзину 45 минути будзе оможївена робота.

У штирох основних школох у Вербаше, по нєурядових информацийох, школска годзина тирва 30 минути. У даєдних вербаских школох у предходним периоду годзини тирвали поряднє, по 45 минути, алє як дознаваме, план бул же би ше шицки вербаски школи виєдначели.

Так у Основней школи „Братство єдинство” у Вербаше ище прешлого тижня, односно 23. януара обявене же у тей школи од 24. януара годзини буду скрацени на 30 минути, а у обгрунтованю за таку одлуку наведзене же заняти даваю потримовку студентом у борби за лєпше и праведнєйше дружтво. Така ситуация и у Основней школи „20. октобер”, у Основней школи „Светозар Милетич” и Основней школи „Петар Петрович Нєґош”.

Вербаска Ґимназия „Жарко Зренянин” у блокади и нєт настави.

Прешлого тижня, 23. януара, предсидатель општини Вербас Милан Ґлушац подзековал просвитним роботнїком у општини Вербас котри орґанизовали предлуженє школского року у складу зоз Законом о образованю и календаром просвитних активносцох котри дефиновало Министерство просвити. З тей нагоди вон поволал шицких просвитних роботнїкох у општини Вербас же би ше пошвецели реализациї наставного процесу.

ПОВЯЗАНИ ТЕКСТИ