ВЕРБАС – Вецей стотки учашнїкох зоз цалей Сербиї були всоботу, 13. мая, часц III Вербаского обегованя котре, по словох орґанизаторох, помали постава ище єден спортски символ городу.
Вербаске обегованє творя сертификовани обегованя на пейц и дзешец километри за змагательох и рекреативцох, як и окремне обегованє на єден километер за припаднїкох Войска Сербиї и припаднїкох Полициї у униформи, а и числени обегованя за дзеци рижних возростох.
По словох директорки Вербаского обегованя Саманти Тот, було 170 змагательох у обегованьох на пейц и дзешец километри, а медзи нїма и 55 елитни атлетичаре, цо вельки успих за Вербас и спортску манифестацию котру ше орґанизує лєм треци раз. Достали нагоду же би орґанизовали и державне першенство на дзешец километри на драги, цо велька чесц, визначела Тотова, а як додала, наздава ше же з исту енерґию предлужа и шлїдуюцих рокох.
Член Општинскей ради задлуженей за спорт Срдян Станич визначел же локална самоуправа дала потримовку орґанизациї обегованьох, як и же препознала важносц обегованьох за дальшу промоцию Вербасу медзи спортистами.
Вербаске обегованє одредзело и нових шампионох Сербиї у дисциплини 10 километри на драги, а то Дюро Борбель зоз Атлетского клубу Апатин у хлопскей конкуренциї котри драгу вибежел за 31 минут и 36 секунди, и Нора Тркля Боца зоз Атлетского клубу Червена гвизда зоз Беоґраду котра вибежела за 36 минути и 46 секунди.
Часц III Вербаского обегованя були и наймладши зоз Здруженя Мултиарт, а интересантносц же Даниєла Бабич зоз Змаєва часц од дзешец километри прешла у инвалидским кочику у тандему з братом.
Резултати обегованьох мож видзиц на тим линку.
