РУСКИ КЕРЕСТУР – Музични фестивал „Водова фестˮ, по други раз у новим єшеньским виданю отримани того викенду, всоботу 21. октобра, у Спортскей гали у Руским Керестуре, на хтроим наступели бенди „Деформитет”, „Неприятель Прелази Зеку”, „Ортодокс Келтсˮ (Orthodox Celts) и ґрупа „С.А.Р.С.ˮ (S.A.R.S.), а зоз хтору наступела и млада керестурска кантавторка Марина Роман, у виводзеню їх заєднїцкей писнї „Волимо се вишеˮ.
Фестивалски вечар почал зоз твардейшим панк-метал-реп наступом бенду „Деформитет”, хтори творя шейсцме млади музичаре зоз Селенчи, а потим у подобним музичним стилу предлужел пейцочлени бенд „Неприятель Прелази Зеку” з Нового Саду.
Зоз своїм препознатлївим ирским фолк-рок ритмом, покус пасивну публику, на ноги подзвигнул беоґрадски бенд „Ортодокс Келтсˮ (Orthodox Celts) хтори наступели зоз найпознатшима гитами, а потим наступела ґрупа С.А.Р.С. хтора позберала найвекше число публики. Попри своїх препознатлївих гитох хтори публика єдногласно шпивала, С.А.Р.С, вєдно зоз Марину Романову, наступел и зоз їх заєднїцку писню „Волимо се вишеˮ.
Конєц фестивалу бул зохабени любительом денс гитох ’90-их, за хтори бул задлужени ди-джей Вуко з Вербасу.
Цаловечаршу програму водзела Кристина Афич, а фестивал помогли – Општина Кула, Туристична орґанизация општини Кула, Месна заєднїца Руски Керестур, подприємства за продукцию меблю „Изґледˮ и „Клуб 10ˮ, дискотека „Амадеусˮ и Здруженє гражданох „Пакт Рутенорумˮ.
