Одкеди почало Европске фодбалске першенство у Нємецкей чий финални розплєт нас чека на нєдзелю, вельо ше бешедовало и писало о такв. „Саудийцох”, односно фодбалерох хтори бавя за клуби зоз богатих арабских жемох. Було их на Евру лєм дас 14‒15, и по чишлє репрезентативцох тота релативно млада и у принципу штучна лиґа анї нє медзи першима 10, алє то углавном шицко познати мена и бавяче хтори маю место у историї националного, та и шветового фодбала. Вшелїяк, найпознатши медзи нїма Кристияно Роналдо, чловек-бренд познатши як CR7.
Дискутовало ше и дебатовало яка их форма и доприношенє бависку матичних репрезентацийох, односно кельо ше на тим страцело одкеди ше преселєли до Залїву. Резултати ясни – у бависку за титулу европского фодбалского шампиона остали Шпания, и лєпши з дуела Голандия‒Анґлия… а у шорох тих репрезентацийох нєт „Саудийцох”. Кажда критика на їх рахунок, односно яку таки вибор законченя кариєри спричинєл утрату фодбалу, звичайно идзе з контраарґументом о дзешаткох милионох петро-доларох хтори гвизди на заходзе там зарабяю за лагодну пензию. Алє, як гвари єден наш популарни коментатор – Дармо пенєжи, кед жиєш под климу.
Таке лаконске, по народски обгрунтованє, опозитне славней реплики з домашнього филма о живоце у Шведскей (жимно, алє стандард…) требало би нас поцешиц же и славним и богатим живот нє лєм пажичка под заквитнутим квецом… кед би и ми нє жили под климу. Правда, нє цали рок як у Арабиї, алє голєм од косидби по ламачку.
Клима у обисцу лєбо фирми постала животни стандард, як зогриванє лєбо вай-фай. Сервис у сезони два раз драгши, як амрел у китайскей предавальнї кед пада. Монтера ше заказує мешацами напредок, як знїманє у державней клинїки. Осиґурачи вибиваю, з фасадох ше злїва и чурком чури, а рахунки за струю… о тим будземе док юлийски сцигню. Озда кажде кого ґод познаме лєбо бешедує на нос, лєбо му затика уха, лєбо скашлює на сухо, лєбо го днями болї глава… алє то углавним бо го лапел цуґ. Дармо спозореня же треба шпоровац и пенєж и струю, дармо препорученя же температурна розлика помедзи вонка и нука нє шме буц понад дзешец ступнї. Резон ясни и здраворозумски – нач сом ю кладол, кед нє дує и нє лядзи. Та най тирва докля тирва, а вец увидзиме. А озда и захладнє.