Дзешец роки „Мелодийох”

автор владимир дїтко
1.1k Опатрене

Пред дзешец роками, тераз уж покойни, Ярослав Сабол зоз Нового Саду, а по походзеню Шидян, бул инициятор идеї же би Руснаци у Шидзе достали єден фестивал и предложел же би то бул Фестивал тамбурових оркестрох, цо у КПД „Дюра Киш” дзечнє прилапене. И од теди прешли дзешец роки, Фестивал роснул и розвивал ше. Основни концепт, назва Фестивала и место отримованя у прекрасним амбиєнту порти Лєтнєй владическей резиденциї, остали нєпременєни.

После перших даскелїх рокох, Фестивал достал ширшу потримовку рускей заєднїци и институцийох и векше значенє у културним живоце Руснацох, нє лєм у шидскей општини и Сриме, алє, шлєбодно мож повесц, и цалей Войводини, а участвовали и змагали ше потераз и оркестри нє лєм зоз наших местох у Войводини, алє и зоз иножемства – зоз Републики Горватскей.

Перши роки ше у порти монтирало рухому бину, а вец з упартосцу и витирвалосцу збудована и лєтня бина. Нажаль, як и кажди рок, и за тот ювилейни Фестивал орґанизаторе з КПД „Дюра Киш” ше найвецей обавали од подлей и дижджовней хвилї, хтора главну часц Фестивала премесцела до сали Словацкого дому. Дижджовна хвиля була и кед бул седми и осми Фестивал по шоре, алє теди були отримани у сали Културно-образовного центру, цо пре адаптацию того року нє могло. А вец ше указала солидарносц и порозуменє словацкого дружтва „Єднота”, бо дружтва у Шидзе медзи собу сотрудзую и помтримую ше.

Од того року „Мелодиї Руского двору” вошли и до календара подїйох значних за город Шид, а Фестивал достава и нови змисти, наприклад у Руским доме пияток бул отримани вечар рок музики, з наступом госцох музичарох зоз Руского Керестура и домашнїх рокерох Шидяньох. Шидянє нє забули анї Еуґена Сабола Ґену, дакедишнього професора и култруного роботнїка, чийо мено ноши награда хтору доставаю найлєпши оркестри. Награди, малюнки зоз подобовей колониї „Руски двор”, обезпечує парохия у Шидзе.

Од самого початку орґанизованя Фестивала, возпоставене моцне сотруднїцтво КПД „Дюра Киш” и парохиї Преображеня Господнього. Же би Фестивал бул успишни кажди рок, числени аматере КПД „Дюра Киш” даваю вельо пожертвовносци и труду. Уж роками зоз музику и шпиванку злучена и руска традиция виложена на богатих етно-штандох, хтори провадзаца час Фестивала. За ювилейни „Мелодиї” велї пожадали же би вон тирвал ище вельи роки и же би ше розвивал.

ПОВЯЗАНИ ТЕКСТИ