Кончиц до конца рока

автор саб
690 Опатрене

Вєдно з тим числом „Руского слова”, до друку пошол и Руски християнски календар за 2019. рок. Полни з интересантнима написами и обсяжнєйши як лоньски, до руских обисцох  дойдзе на час и як ше спада, же би ше през наступни швета и жимске геверованє после нїх сцигло на мире почитац тоту „найважнєйшу руску кнїжку”. Потим на шоре и наш мурови календар, хтори читаче „Руского” достаню з новорочним числом новинох.

По конєц рока ище даєдни ствари и теми значни за руску заєднїцу буду закончени. Найскорей ше цалком закончи формованє орґанох, одборох и роботних целох Националного совиту Руснацох, о чиєй конститутивней скадзки мож пречитац на бокох Тижньовнїка. Буду закончени и локални виберанки у Кули, хтори тиж наявюєме. Фельтон з нагоди 100-рочнїци Велькей народней скупштини тиж ше блїжи ґу концу и приблїжує ше ґу Руснацом. И у рубрики Людзе роки живот мож пречитац интересантни напис о єдному од наших актерох тей подїї, а зоз статї др Дюру Гардия на Анатомиї  доставаме дзепоєдни информациї о истей теми хтори потераз були познати лєм науковцом.

И през историю, и у каждодньовим живоце, ми, випатра, нє можеме сцекнуц од „мултикултуралносци” и шицких феноменох хтори ше звичайно тримаю як состойна часц того широкого поняца. На бокох Култури, Наших местох, Духовного живота, та и Руского словечка, пишеме о дзепоєдних з нїх… У ствари, кед ше лєпше роздума, нє же нє можеме, алє анї нє пробуєме сцекац, бо нє мож сцекнуц од того цо ши, од самого себе.

На концу, и спортска рубрика у тим чишлє подцагує смужку. Турнир у пикаду Спортских бавискох „Яша Баков” тиж бул остатнї їх турнир у тим року. После того змаганя и друженя, „Баковци” иду на паузу.

Пред читателями и биланс єшеньскей полусезони у локалних фодбалских лиґох дзе бавя клуби з наших местох. По шицким, була то фодбалска єшень хтору ше  по бависку, форми екипох и ґолґетерох, резултатох и пласману у Коцуре, Керестуре и Дюрдьове будзе паметац. Лєм най би наяр шицки предлужели ту дзе их претаргла жимска пауза.

ПОВЯЗАНИ ТЕКСТИ