Нє часто маме тидзень таки полни зоз подїями у рускей заєднїци и штредку дзе жиєме, як цо бул тот за нами. Завитни дзень у Водици и ювилей нашоґо Еґзархату. Ювилейни Польопривредни саям. Позарядови успих и перше место Мирослава Малацка на републичней смотри рецитаторох. Успишна промоция Латяковей кнїжки „Руснаци” у Заводзе. Хор „Розанов” пред домашню публику, а керестурски Дом култури у Риєки. Перши „пионирски” фодбалски турнир на керестурским Ярашу… и ище вельо того интересантного о чим годно читац у тим „Руским”.
Медзитим, з тей нагоди визначел бим „Ноц музейох” хтора отримана всоботу. У Европи ше тота манифестация отримує уж вецей як двацец роки, а у нас того року була штернасти раз, у вецей як 50 городох и варощикох, и на даскельо стотки локацийох. Порушана з идею „врациц културу людзом”, през два децениї „Ноц музейох” постала наймасовнєйша културна подїя на Старим континенту. У якимшик постмодерним ключу збила вєдно елитизем и популизем, та маме нагоду видзиц людох хтори сцерпезлїво чекаю у шоре же би опатрели постановку у музею коло хторого иншак каждодньово ровнодушно преходза. То нє критика, напроцив.
Култура, окреме тота вершинска хтора представя скарб и тал чловечества, часто стої централизована у метрополох, изолована на парнасовских висотох и заварта у монументалних зданийох до хторих нїхто нє доходзи. Бо живот швидки а дзень кратки, а конкуренция поверховей розваги моцна. Та, хто вец будзе трошиц час на оплемeньованє духа, кед то и так „за елиту, а нє за народ”. Прето остатнї час маме тренд же културни институциї виходза вочи публики: филгармониї наступаю на пияцох, ґалериї викладаю на гайзибанских станїцох. Музеї ше у „своєй” ноци тиж приключую ґу тому тренду, так же свойо академични постановки збогацую и преширюю з мултимедиялнима и интерактивнима змистами, презентациями, роботнями за нащивительох…
Наш фокус унапрямени на змисти „Ноци музейох” по наших местох: у Вербаше, уж традицийно у Коцуре, перши раз у Керестуре. Повед бим же шмелосц и дзека орґанизовац таки манифестациї у малих штредкох то праве триюмф и сполнєнє мисиї тей велькей, европскей „Ноци музейох”. А то, на концу, же култура муши буц доступна каждому, та гоч и лєм єден дзень до рока.