Традицию чуваю за будучносц

автор сас
917 Опатрене

Закончени ище єден, традицийни Фестивал жридлового шпиваня „Най ше нє забудзе” у Дюрдьове. Єден є з визначнєйших манифестацийох у нашей заєднїци, и препознати и припознати як руски фестивал од националней значносци. Обчековало ше и  анї нє чудне же го потримую шицки компетентни явни установи и институциї – од „найнїзших валалских”, прейґ општинскей, по компетентни покраїнски секретарияти и шицки нашо визначни руски институциї.

Того року на Фестивалє зишли ше дванац шпивацки ґрупи зоз дзешец наших местох, и то за кажду похвалу, и за орґанизаторох, и за госцох хтори ше одволали. И того року є отримани у трецим тижню авґуста, алє по першираз всоботу, же би, як домашнї визначую – учашнїки и публика могли остац цо длужей на друженю и одпочинуц ютредзень.

Змистово вше интересантни и интерактивни, з двома тематскима виставами и вечаршим фестивалним концертом зоз змагательну и ревиялну часцу – нє одуставаюци од автентичносци у каждим поглядзе и нїяк нє применююци алтернативу у гоч котрей часци орґанизациї. Орґанизаторе свидоми же основа и добри фундамент найважнєйши за добру роботу, та и єй резултат. Од самого початку на тей дюрдьовсскей манифестациї почитує ше и применює прецизни урядово правила и пропозициї фестивалского наступу. Дефиновани пропозициї за облєканє, чесанє и шпиванє, репертоар… Шицко то дава чежину и достоїнство Фестивалу жридлового шпиваня „Най ше нє забудзе” у Дюрдьове, як и припознаньом хтори ше додзелює.

Тиж треба визначиц же ше дюрдьовскому КУД „Тарас Шевченко” хтори и ношитель Фестивалу, удава  активовац и младшу популацию, нашлїднїкох. У Дюрдьове „нє бави” же кед дацо традицийне, же є застарете и допите. Так то  дзекуюци Дружтву и його водзацим котри маю слуха за младших, розумя смак  старших,  и маю чувство зєдинїц традицию и младосц, а нє одступац од того цо жридлове.  На тот способ, руску традицию науча, прилапя и пренєшу далєй и шлїдуюци ґенерациї.

ПОВЯЗАНИ ТЕКСТИ