Добре же єст Бога, же є добри, барз сцерпезлїви и же Христос воскреснул, та вец можеме и ми, односно же нє завиши шицко од нас. Штреднє патрено, як актуална дозрета ґенерация хтора креирує живот, ми нєуспишни, млади то похопели, нє веря нам же зме способни за лєпше и сцу пойсц од нас, гоч и на други конєц швета. Уж роками, децениями, упарто тримаме водзаци места у неґативносцох у блїзшим и дальшим околїску. Наприклад, без социялного осиґураня аж 570 000 заняти „на чарно”.
И док ми углавним импровизуєме живот, знанє и роботу, фаховци вираховали же стопа ризику од худобства у Сербиї 25,5 одсто, по чим зме у европским верху. Кажди штварти житель у ризику од худобства. Найвиложенши ризику од худобства то млади од 18 по 24 роки (32,7 одсто), потим гевти младши од 18 роки (30,2 одсто), док найменшу стопу ризика од худобства маю особи старши од 65 рокох (19,1 одсто). Штреднї нето заробок (без порцийох и доприносох) на початку того року бул 41 500 динари.
Як ми вообще преживюєме? Углавним так же ше креативно „знаходзиме” и трудзиме цо вецей достац и вжац од заєднїци, зоз цо менєй укладанями. Прето заєднїца, штреднє патрено, охудобнює и уж децениями є на нїзких конарох. Психолоґове гваря же кажди чловек ма потенцияли за креативносц, без огляду на интелиґенцию, образованє, статус итд. Тоту креативносц ми надосц хаснуєме за одберанє од постояцого, а нє за творенє нового и вредного. Ґу тому мож додац же з виглєдованями установене же ше найлєпше спреведа, и найчежше то одкриц, кед ше спреведа самого себе.
Филозофове науки твердза же ше даєдни парадиґми (способи живота, твореня и справованя) нє меня анї з еволуцию, анї з револуцию, алє так же щезню (помру) їх заступнїки. Млади и без филозофиї и науки „сконтали” же найлєпше нїч нє чекац, алє пойсц отадз.
Шицко то живот, и можеме цо сцеме, лєм нє докля сцеме. Мушиме умрец. Пойсц там дзе можебуц думаме же нєт нїч (а цо то нїч?). Медзитим, цо кед ше раз пребудзиме и наисце, воистину воскрешнєме, и кед нам хтошка пове же зме нїч нє принєсли од того цо зме мали, а же нашо лєм тото добро цо зме дали другим?