Як знаме, и як можеме

автор ґабриєла саянкович
1k Опатрене

Чловек ше з правом цеши з резултатом своєй творчей роботи. Кед прилапиме твердзенє же култура то шицки чловеково креациї, односно шицко цо чловек зоз своїм дїлованьом преображел, можеме вшелїяк повесц же ше у обласци култури ми, Руснаци,  маме зоз чим цешиц. 

Насампредз, зоз тим цо зме зачували. Нашлїдство. А вец окреме и зоз тим цо зме поробели и цо ище вше твориме зоз нашлїдзенима диспозициями, и як народ, и як поєдинци.  У важацей Националней стратеґиї, заш лєм,  досц критично обгрунтовани стан у рускей култури у остатнїх даскельо рокох, скептично ше патри и на єй розвой и напрям. Прецека таке думанє часто и нєшка през  вияви и явни роздумованя поєдинцох. Тримам же то шицко завиши од свидомосци о наших можлївосцох, можлївосцох  єдного малочисленого народу без (ище єдней) матичней держави як твердинї и матки, у рамикох таких дружтвених обставинох  у яких жиємe уж телї роки. Кед зме свидоми шицкого спомнутого, заш лєм думам же ше маме зоз чим цешиц.

Нас, Руснацох, у Сербиї єст коло 15 тисячи.  Розошати зме по цалей Войводини, отаргнути єдни од других вше за крочай, вше за дзень, хтори нам хиби кед ше сцеме  зисц. Алє зме грудка, и свойо зме. Тельо кельо нас уж єст,  маме Завод за културу войводянских Руснацох, 16 здруженя гражданох у култури, институцию Дома култури, професийни Театер, вельке число поєдинцох хтори творя звонка орґанизованих институцийох и здруженьох, и 20 манифестациї, и то  лєм у прилапеним Календару манифестацийох… А дзе ище шицко друге цо лєм рошнє и розвива ше. 

Кед рушице по Новим року после означованя Националного швета у януару, уж у марцу можеце присц послухац нови руски шпиванки на „Ружову заградку” у Новим Садзе. Отамаль, придзеце цо Керестура на Мемориял, а вец  до Суботици на „Яр Мафтея Виная”. У маю вас привитаю у Орахове на означованю дня приселєня Руснацох до того места, вец зайдзеце до Коцура на „Ноц музейох” и предлужице до Вербасу на Стретнуце хорох. У маю нє препущце и валянє майского древка на фестивалу „Пришли нам Русадля” у Бикичу. А вец шор пойсц и на Кирбай до Беоґраду. То шицко у маю. Початком юния вас дзеци розвешеля на „Веселинки” у Новим Садзе, а вец ше концом мешаца  шицки зидземе и окреме повешелїме на „Червеней ружи” у Керестуре. У юлию вец пойдземе затанцовац на „Жатву” до Коцура,  мальовац  до Ґосподїнцох на „Стретнуце у Боднарова”, а вец у авґусту до Дюрдьова зашпивац давни шпиванки на фестивал „Най ше нє забудзе”. Початком септембра заграю гудаци у Шиду на „Мелодийох Руского двору” а у октобру нащивиме фестивал „Мацери Рускинї” у Сримскей Митровици. У новембру даме чесц литератури и писаному слову на „Костельниковей єшенї” у вецей наших местох, стретню ше и рецитаторе у Кули. У децембру нащивиме Фестивал малих сценских формох у Новим Садзе и означиме Днї Миколи М. Кочиша скоро у шицких наших местох. И так каждого року. Нас грудка. Як знаме и як можеме. Кед ше упоредзиме наприклад зоз Кулу, як местом, котра ма дакус вецей жительох як цо нас єст шицких вєдно, а хтора ма єден Културни центер, пейц културно-уметнїцки дружтва, єден театер (треба припознац, позарядово добри) и нє вецей як 10 културни манифестациї, можеме ше цешиц и повесц же зме богати, вредни и креативни народ. А ґу тому бим сцела  дац чесц и шицким нашим културним дїячом котри творя самостойно, або у рамикох других институцийох и котри свойу творчосц нє маю нагоду приказац на орґанизовани способ през активносци руских институцийох, установох, дружтвох.

Алє тиж так, нє треба ше гнац  прейґ гранїцох, анї креативносци, анї моцох, а анї средствох хтори нам потребни за шицко тото. Обчековац и од других и од нас самих же бизме могли створиц и твориц  шицко цо може и векшински народ у своєй держави. Думам ту  и на аматеризем, и на роботу у дружтвох, алє и на снованє институцийох хтори нам так хибя, як цо то архив, библиотека и ґалерия. За их снованє, боїм ше, ище длуго нє будзе досц моци, а окреме средства, хтори муша буц тирвацо обезпечени, нє лєм за снованє, алє и за порядну роботу, за занятих, за материялни трошки, а то нє завиши од нас. Ту ришеня мушиме глєдац у постояцих институцийох, як державних, так и наших националних. И цо скорей зоз фаховцами найсц найлєпши ришеня за очуванє нашого скарбу. Бо, пенєжи вше будзе мало за шицко цо бизме сцели. Алє, гоч ше динари и награбка, старайме ше и най ше нас награбка. И за зашпивац, заграц, рецитовац, затанцовац, написац, намальовац, повиглєдовац, научиц, направиц. И за нащивиц, послухац, пречитац… Бо, людзе тоти котри творя културу, и конзумую ю. Кед будзе хто дзеци приводзиц на годзини и проби, кед будзе тих цо креативносц пребудза, укажу драгу, вец будзе и кому и кнїжки видавац, и фестивали орґанизовац, и институциї отверац.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ