Класика у мултимедиялней програми

автор ол. планчак сакач
259 Опатрене

У центру Нового Саду, у ексклузивним просторе Сербского народного  театру, у його Велькей сали „Йован Дьордєвич”, отримана Шветочна академия Централней преслави Националного швета Руснацох у Републики Сербиї. Програма була мултимедиялна, обдумана так же би ше ю могло вивесц у присустве публики, без публики и у виртуелним просторе, пре уж добре познати причини пандемиї, хтора провадзела пририхтованє и уношела нєизвесносц и до єй реализованя.

Без огляду на шицко, Национални дзень Руснацох означени шветочно, внєдзелю, 23. януара, у присустве велїх госцох, а було госцох и зоз иножемства. Преслава почала зоз Архиєрейску благодарну Службу Божу, хтору одслужел преосвящени владика, кир Георгий Джуджар у присустве священства и вирних у церкви св. апостолох Петра и Павла. Предлужела ше з отвераньом вистави и коктелом, а закончела зоз Шветочну академию. Мултимедиялна програма през котру зме були вєдно зоз нашима етаблованима младима музичарами, хтори пошли жиц до швета – Люпку Рацову, оперску и камерну шпивачку у Швайцарскей, Сашом Ґрунчичом, орґуляшом зоз Горватскей и др Дарком Варґом, пиянистом зоз Зєдинєних Америцких Державох, котри присутней публики повинчовали швето и указали часц свойого репертоару.

Публика у сали СНТ мала нагоду провадзиц наступ Катарини Ковач, дзивки композитора Ивана Ковача, хтора виведла єдну його композицию на гушлї, у провадзеню пиянистки Наташи Пандурович. У програми учасц вжал и новосадски Хор „Гармония” и наш наградзовани рецитатор Мирослав Малацко. Шицки наступи були попреплєтани и зоз фотоґрафиями и панорамским филмом Нового Саду, а до програми були уткани и венчики руских мелодийох, хтори виведол Национални оркестер под дириґентску палїчку Мирона Сивча.

И шицко би було наисце цалком крашнє заокружене, кед би у технїки нє було препущеня, яки ше нє шмели случиц на таким вечаре, окреме же на ґенералней проби було шицко у шоре. Алє и без огляду на тото, велї нащивителє гварели же Академия наисце була добре обдумана, же було цошка нове и иншаке, же нє була реприза наших фестивалох, же указала уровень нашого досягу у музичней сфери.

На шлїдох своїх предходнїкох, хтори участвовали у роботи СНТ, як цо то театрални и филмски ґлумец Драґутин Драґен Колєсар, оперска шпивачка, примадона у Опери Ирина Давосир-Матанович, балерина Славица Гатваґнер-Копчански, директор драми Дюра Папгаргаї, композитор Иван Ковач и ище велї други културни дїяче котри и нєшка участвую у живоце тей културней институциї – Академия указала же маме достойних нашлїднїкох. А кажди народ, хтори пестує нашлїднїкох, обезпечел свою будучносц.

ruske.redaktorka@gmail.com 

ПОВЯЗАНИ ТЕКСТИ