Уж давного 2008. року стретли зме ше першираз у Новим Садзе означиц цошка нове. Националне швето Руснацох у Републики Сербиї.
Здогадуєм ше як Национални совит у другим зволаню, цали рок пред тим пошвецел активносцом и порадом на преглашоваю и возпоставяню истого.
Було вецей предкладаня о термину преслави: на Кирбай у Руским Керестуре 9. мая, Завитни дзень на вельку Матку божу…, алє превладало роздумованє и здогадованє, на 17. януар 1751. року кед подписани контракт о насельованю 200 грекокатолїцких фамелийох на тедишню пустару Вельки Керестур, на датум котри прилапени як дзень урядового насельованя Руснацох на тоти простори.
На южни простори Панонскей ровнїни дзе дзекуюци вецей як двоиполвиковному иснованю зоз народами у окруженю, зоз котрима Руснаци дзелєли и хлєб и трапезу и нїґда з нїма нє мали зраженя.
На терашнї простор Републики Сербиї котру войводянски Руснаци тримаю за свойо отечество, алє источасно поставаю и свойофайтови мост вязох Сербиї зоз державами штреднєй и восточней Европи дзе ше находза нашо историйни коренї.
Сами початки нє були лєгки, насампредз, у финансийним смислу. Шицки трошки подмирйовал Национални совит, познєйше новоосновани Завод за културу войводянских Руснацох. Як швето заживйовало у руских главох, так исто помали и локални самоуправи у котрих жию Руснаци почувствовали потребу уважовац и часточно софинансовац централни преслави у їх штредкох.
Вишоровали ше Нови Сад, Руски Керестур, Шид, Коцур, Дюрдьов, Сримска Митровица, Нове Орахово, Вербас, Кула, Бикич, Суботица. Стретали зме ше и ми свойо, стретали зме ше и з другима, черали идеї, ришовали проблеми. Швето помали постало руска институция котру почитую и Руснаци, и народи зоз котрима жиєме у окруженю.
Того 2019. року Швето ше, гоч дакус прейґ шора, враца до Матки. До Руского Керестура, котри як шпивал Костельник, „двацец езром мац и глава”. До Керестура у котрим до першей класи основней школи уписане 21 дзецко, зоз котрого ше виселєло вецей як 100 фамелиї.
Но заш лєм, прегирмел Керестур и колери, и вельки води, и войни. Нашол моци ше обновиц и оздравиц.
Най тото дванасте швето у Руским Керестуре будзе искра котра ознова обнови наш валал.
Збийме свойо шори, шицки поєдинци и институциї у нашим валалє. Нє шму розлични думаня, попатрунки, национални и политични опредзелєня, буц препреченє за сотруднїцтво. За таке дацо мушиме мац и моци и шмелосци и мудросци.
Привитайме на нашим швету щиро шицких госцох зоз наших местох, зоз старого краю, представнїкох других народох, державних институцийох.
Укажме же Керестур ма моци, сили, и надалєй остац „мац и глава двацец езром”.
Щешлїве нам швето!