И тогорочна Културна манифестация „Коцурска жатва” и стретнуце младих облапяла богатство рижних змистох, у чиїм фокусу бул єден вельки и значни ювилей – 80 роки иснованя Активу женох Културно-уметнїцкого дружтва „Жатва”. Його аматере и младеж, вєдно зоз Коцурским здруженьом младих, женами зоз Активу, алє и другима валалскима дружтвами и здруженями, пред вецей мешацами з вельку дзеку почали плановац и пририхтовац тоту, того року 46. по шоре, визначну валалску манифестацию.
Дводньова програма була богата зоз змистами за шицки возрости и прихильносци. Почало, уж традицийно, зоз роботню за наймладших през котру ше орґанизаторе намагаю зачувац интересованє при дзецох за нашо обичаї, културу и историю. Судзаци по одволаню и ентузиязму зоз котрим ше дзеци уключую до таких активносцох – наша традиция ещи як ма будучносц!
Шлїдзели и едукативни змисти, дзе ше нащивителє манифестациї могли упознац зоз Википедию на руским язику, єй функционованьом и шицкима єй предносцами. Промоция закончена з упечатком же ше при Коцурцох порушало заинтересованосц и же ше нєодлуга на Википедиї зявя и статї нових сотруднїкох зоз валалу. Провадзаци програми були пошвецени и спортским змистом, а приказана и краса ручних роботох, и традицийно пахняцих етно столох зоз найсмачнєйшима єдлами у котрих могли уживац шицки почитователє традициї.
Найблїщацша часц тогорочней „Коцурскей жатви” була святочносц отримана у Велькей сали Дома култури, кед ше на бини зменьовали танцоше, гудаци, шпиваче, поприберани у найкрасших народних облєчивох. Були ту нашо два валалски културно-уметнїцки дружтва, алє и госци зоз велїх других руских местох – з Вербасу, Дюрдьова, Кули, Руского Керестура, Суботици, Нового Саду, Ковачици, Бикич Долу, як и з Петровцох з Републики Горватскей.
Заш лєм, цала манифестация була преткана зоз ювилейом котрому єдна окремна часц була и пошвецена, а то праве означованє длугорочносци тирваня Активу женох. Без їх вредних рукох, сучасних и народних єдлох приготовених и виложених з їх ошмихами – нє мож задумац анї „Коцурску жатву”, анї єдну другу манифестацию и подїю у валалє, а и ширше. Без Активу женох би кажда манифестация, як и културни живот валалу, нє були подполни. Кажда жена у тим ланцу важна каричка хтори ещи вше иснує и моцно повязує шицки народи нашого валалу, а през здогадованя и емоциї котри ше роєли того вечара, видвоєла ше лєм єдна думка – на многая и благая лїта, Коцурици, же бисце голєм ещи 80 роки були таки єдинствени представнїци шицких нас!