Кажде хто жада витвориц свойо ґарантоване меншинске право, право гласац на виберанкох за Национални совит рускей националней меншини треба же би бул уписани до Окремного виберацкого списку. Упис ше окончує лєм раз на власну вимогу особи котра ше вияшнює як Руснак. Конкретно, хто ше уж раз уписал, нє треба же би ше уписовал oзнова, алє особи котри потераз нє уписани, як тоти цо у медзичаше наполнєли осемнац роки, та и старши котри потераз нє вихасновали тоту нагоду, треба же би то зробели.
Кажда особа котра наполнї 18 роки, по автоматизму ше уписує до Єдинственого гласацкого списку, и з тим здобува право гласац на шицких виберанкох од локалного по републични уровень, та и о референдумских питаньох, медзитим, праве ше велї полнолїтни особи часто нєсподзиваю кед на дзень виберанкох нє можу гласац за национални совит. Праве прето важне потолковац, же упис до Окремного виберацкого списку нє може окончиц нїхто у мено дакого, нїяк нє треба обчековац же дахто уписани у ОВС лєм прето же ше на попису жительства вияшнєл як Руснак, або же жиє у руским валалє, лєбо же ноши руске презвиско.
Виберанки за шицки национални совити буду отримани исти дзень, 8. новембра, окремни виберацки списки за кажду националну меншину водза локални самоуправи, односно городски управи. Упис и шицки вименки у ОВС мож окончиц найпознєйше по 23. октобер, а за похвалу же сама процедура тирва наисце лєм два минути на шалтеру, дзе ше придава пополнєти формулар як вимога на єдним боку зоз основнима податками о особи котра подношитель.
Важне и надпомнуц же єдна особа може буц уписана лєм у ОВС єдней националней меншини, алє же и то пременлїва катеґория, значи кед же иста особа тераз уписана до ОВС єдней националней меншини, после виберанкох може буц уписана у списку другей меншини. Пременки нє мож правиц у периодзе кед же ОВС заключує дочасово, углавним пред самима виберанками, и пред тим як ше виберанки розписує.
На шлїдуюцим линку мож превериц чи сце уписани до ОВС, процедура єдноставна, досц удуркац лєм єдинствене матичне число граждана www.upit.posebanbirackispisak.gov.rs