И того року отримани пригодни манифестациї и подїї з нагоди, 9. мая, Дня побиди над фашизмом и Дня Европи. Як вираз почитованя и пиєтету, на памятнїки борцом покладзeни венци, як вираз надїї и одшмелєня, слухали зме винчованки и бешеди о нашей европскей перспективи и нє так далєкей будучносци у фамелиї европских народох и державох.
Медзитим, з рока на рок вше баржей обачиц же на тот дзень, у ствари, векшина слави лєм єдно швето, тото хторе му по власних преференцох и афинитетох баржей „лєжи”, а гевто друге скоро же иґнорує. Тото подзелєнє функционує по нєясним критериюму и на символичним уровню, а у ствари, є подзелєнє на „евроентузиястох” и „евроскептикох”. На акцию и реакцию, у сущносци на Заход и Восток. И як таке, цалком є погришне и без основи.
Гоч то, голєм формално два швета, два здогадованя на розлични подїї, наисце су єдно, нєрозлучне. Нє лєм прето же би без Дня побиди нє було анї Шумановей декларациї, алє насампредз же обидва датуми дзеля исти цивилизацийни и чловеколюбиви вредносци шлєбоди, толеранциї, ровноправносци. Нєшкайша Европа бранєна и будована и на побережю Волґи, и на плажох Нормандиї.
Правда, Европска уния нєшка ма свойо бриґи. Бреґзит, криза у України, ситуация зоз Каталонию, миґранти, моцнєнє правоориєнтованих рухох и популистичних лидерох… ґу тому, ище вше нє шицки членїци санировали пошлїдки ґлобалней рецесиї, а нє прешла анї „вистатосц од преширеня”. Медзитим, праве то потвердзенє же Европа жиє, нє лєм як идея, алє як конкретни, дїлатни орґанизем. Бо, то и у живоце нє шицко лєм шпиванка и квеце. Тиж як и у живоце, кед себе поставяме приоритети хтори проблем перше ришовац а цо може чекац, и Европа ма свойо приоритети. На нашу жалосц, лєбо щесце, хто уж як патри, наш реґион, ткв. Заходни Балкан, тераз нє медзи нїма. З другима словами, як цо ше уж случовало за остатнї трицец роки, єден час нас нє будзе цагац за руку, цо значи же ше сами мушиме баржей потрудзиц. Вироятнє праве то тото „квашне грозно” пре хторе рошнє евроскепса и прихильносц ґу рижним еґзотичним алтернативом, вироятним тельо кельо и даяка нова штурма на Райхстаґ.