Красота и моц писаного слова

автор иван сабадош
899 Опатрене

У исти час кед ше закончує друкованє того числа „Руского слова”, на Шейдзешат другим Медзинародним сайме кнїжкох у Беоґрадзе заказани термин за представянє рочней рускей литературней продукциї нашей видавательней хижи и писательох розличних ґенерацийох хтори пишу и обявюю (и) по руски. Пред тим, у заєднїцким наступе заводох за културу меншинских националних заєднїцох з Войводини, уж ше зоз своїма публикациями представел наш Завод за културу.

Беоґрадски саям кнїжкох за велїх нас з „провинциї” нє лєм културна подїя рока, алє и место паломнїцтва дзе ше идземе поклонїц писаному слову и послухац бешеду мудрих. Саме присуство рускей кнїжки и єй авторох на такей подїї кладзе нас на културну мапу держави и реґиону.

Кнїжка тема и водзаци мотив и октоберского Литературного слова.

Длуговични и нєшка уж класични додаток „Руского слова”, афирмує младих творительох и презентує досяги уметнїцкей литератури по руски. Найважнєйше єй опредзелєнє же би векшина публикованого материялу були ориґинални и нови роботи, а рубрика отворена младим сучасним автором, цо их може препоручиц за самостойни наслов у Видавательстве. Нє менєй значне, здогаднуц на старши твори и искусних авторох хтори уж обявйовани. Медзитим, авторки и авторе друковани у тим чишлє „Литературного” здогадую же писане слово, попри естетичней и уметнїцкей функциї ма и дружтвену и общецивилизацийну функцию. Жє є нє лєм красне, алє и моцне.

Од уводного спозореня же у варошох и варощикох хтори дараз були упорища култури и просвищеносци, кнїжку мож купиц лєм у бутки лєбо супермаркету, по свойофайтови литерарни апел: Читайце, людзе! Пишце! То нє празни слова хтори приходза од даякого пасивного, просекового „конзумента култури”. Автентични су, бо их  висловюю  особи, авторе хтори цошка уж створели, и хторим, цо пре роки, цо пре дзеку и шмелосц, найскорей припаднє будучносц нашей литератури. А тоту будучносц жадаю подзелїц з Вами.

ПОВЯЗАНИ ТЕКСТИ