У фамелиї фестивалох и манифестацийох хтори за тему маю даєдну форму рускей култури, зявюю ше, випатра, два нови члени. Концом септембра у новосадским РКЦ отримана „Акустика Рутеника”, а викенд познєйше у Шидзе „Русин филм фест”. Обидвом то було друге виданє – нарок уж годно повесц же су традицийни. Орґанизаторе обидвох вибрали и тайминґ и тему. Пополнєти простор медзи лєтнїма рускима „фолклорнима” фестивалами, а док ище нє почнє права єшень, час за кнїжку, литературу и Костельника.
Здогадованя хтори при даскелїх ґенерацийох зобудзел фельтон „Як нє скапал рокенрол” потвердзел стаємну, константну потребу – жадни зме новей музики, хтора опарта на и инспирована з поп културу, та гоч є и акустична, лєм най будзе по руски. Потребне место и подиюм дзе ше можу представиц авторе з иншаким сензибилитетом, лєбо тоти хтори попри жридлового шпиваня и фестивалских шлаґерох, маю и ширши афинитети. Кед слово о филму хтори найподполнєйши аудио-визуелни медий, алє продукцийно и найдрагши, ту потреба, односно суша ище векша. Права, конвенцийна руска продукция на тих просторох дзелї судьбу драмскей и документарней продукциї ТВ Нови Сад, односно нєшкайшей РТВ, алє у нєшкайшим диґитализованим швеце милениялцох верим же лєм питанє кеди ше зявя вецей кратки форми хтори превозиду микро жанр рижнородних „влоґох”. У жемох Горнїци обставини у обласци култури ґенерално лєпши, алє анї там нєт вельо руски, лєбо витвореня о Руснацох. Подобно як у ексюгославянскей кинематоґрафиї и документаристики од дзеведзешатих та скоро по нєшка, векшина тих дїлох, чи уметнїцких чи фактоґрафских, вимага спозоренє хторе, наприклад, Википедия лїпи на твори хтори обробюю горуци теми – же представя лєм єден можлїви попатрунок, зависно од опредзелєня синеасти, продуцента лєбо финансиєра. Но, то нє значи же их нє треба видзиц и прештудирац, а фестивал у Шидзе, чийо полне мено Медзинародни мултижанрови фестивал руского филма „Русин филм фест”, би могол буц нагода.
Медзитим, кед бим могол суґеровац орґанизатором и порушовачом даяких будуцих случованьох того типа, най им нє будзе чежко найсц инспирацию и миру кед меную свойо „чадо”, бо го то одредзи за цали живот. Лєбо най голєм виберу мено хторе мож запаметац и виґажиц. Музични вечар „Акустика Рутеника” лєбо Спортски бависка „Яша Баков” добре звуча и лєгко их запаметац. Других членох фамелиї фестивалох и манифестацийох, углавним, познаме лєм по назвискох.