Два вистки зоз остатнєй схадзки Републичного совиту за национални меншини на чиїм чолє предсидателька Влади Сербиї Ана Брнабич визначени у звитох меншинских медийох и порталох хтори провадза тоту тематику. Перше, же Буджетни фонд за национални меншини у 2018 року значно звекшани и же є „чежки” скоро 22 милиони динари, и друге, же сет предлогох даскельо законох сущних за сполньованє правох меншинских националних заєднїцох и їх културней автономиї прешлїдзени на експертизу и даванє думаня фаховцом зоз Европскей униї.
Перша вистка без дилеми добра, понеже кед сновани спомнути Буджетни фонд, хтори обдумани же би дополнююцо финансовал приоритетни обласци сполньованя културней автономиї меншинох, на рахунку мал лєм символичну суму. Кельо тераз годно поробиц з розположивим пенєжом у тим року, насампредз у обласци информованя на меншинских язикох, увидзи ше док будзе розписани и закончени конкурс.
Другу информацию треба брац без превелького одушевия, же би на концу нє було и вельке розчарованє „до Европи”. Ниа, прецо. Гоч узвичаєне же ше у процесу приступних прегваркох о членстве держави кандидата у Европскей униї до домашнього законодавства скоро дословно преписую европски стандарди у лєм цо нє шицких обласцох живота – польопривреди, еколоґиї, енерґетики, транспорту, кед слово о „меншинских правох” у смислу того цо поняце за нас значи и як го толкуєме (колективне право, позитивна дискриминация, буджетне финансованє…), у ствари нє постоя „европски стандарди”. Окрем найвисшого начала ЕУ же кажди поєдинєц муши мац право шлєбодно ше вияшнїц по каждим опредзелєню и буц зашицени од дискриминациї по гоч якей основи, Брисел и Стразбур каждей держави членїци охабели най сама ришує питанє статусa и правох националних меншинох на способ як єй то найвигоднєйше. Окрем у случаю же ше гнобя лєбо загрожую елементарни людски и граждански права, у тей обласци нєт диктату.
Прето го нє треба обчековац анї у нашим случаю, евентуално же тото питанє, лєбо голєм даєден його аспект, знова достанє даяку политичну конотацию пре одношеня у реґиону. Значи, европска експертиза наших законох найвироятнєйше укаже же су по форми без гришки. Вельо би нам вецей значела нєзависна оцена їх сущносци, односно кельо су применлїви у живоце и пракси.