Фельтон-репортажа „Як (нє) скапал рокенрол” сцигол по свойо XIV предлуженє. У тим чишлє „Руского слова” починаме зоз керестурску рок сцену, котра коренї початкох цага єднак як и у шицких руски местох, алє у Руским Керестуре вона була розконаренша. У жанру постпанку тота музика ше там затримала по нєшкайши дзень.
Серия тих фельтонох зробена на инициятиву наших читачох прейґ Фейсбуку, дзе у идейох, предкладаньох, порученьох и коментарох участвовали вецей дзешатки людзе. То значи же тота тема интересує ширши круг читачох. Медзитим, кед зме почали о тим писац, а повод нам бул 55-рочнїца рокенрола у Вербаше, видзели зме же рок на тих просторох моцно означел младосц цалей єдней ґенерациї и бувша младеж ше го дзечнє здогадує.
Субкултури ше нє барз детально провадзело у руских медийох, прето же су з нука заєднїци часто третировани як нє традицийни, нє руски, пребарз общи, младежски або нє важни. Так зме ше одрекли велькей часци творчосци по руски, котра ґравитовала ґу популарней култури, забуваюци же ше до националних корпусох других народох тот скарб давно асимиловал.
Року 2012, на означованю 60. рочнїци пребуваня на трону кралїци Елизабети II, у подлоги за приєм госцох грали Битлси…
Кед настал, рокенрол бул ношитель идентитета младих и з нього ше розвили рижни файти сучасней култури (литература, филм, стрип) и способи водзеня живота (мода, любов, забава, култура уживаня). Рок култура мотивовала и либерални способ роздумованя.
Кед слово о шлєбодох – шлєбода медийох у Сербиї нєшка вельо горша як прешлих рокох. О тим шведоча виглєдованя медзинародних орґанизацийох Репортере без гранїцох и Фридом хаус. Прето ше новини „Руске слово”, вєдно з вецей як 120 медиями (кельо их було до законченя того текста), приключели кампанї „Заєднїцка акция процив медийней цмоти!”. Запаметайце, нєт шлєбоди и демократиї без шлєбодних медийох.
Пишце нам – redaktor@ruskeslovo.com